ЯҢАЛЫКЛАР

2020 елның гыйнвар, март айларында Татарстан Республикасы Милли китапханәсенең укучыларга хезмәт күрсәтү бүлеге хезмәткәрләре (Казан, Кремль ур., 33 йорт) «Мин – укучы» әдәби проекты кысаларында Казан шәһәре Авиатөзелеш районының 117 нче һәм аерым фәннәрне тирәнтен өйрәнүче 54 нче урта гомуми белем бирү мәктәпләре укучылары өчен, шулай ук Казан шәһәре Совет районының П.А. Полушкина исемендәге 101 урта гомуми белем бирү мәктәбе укучылары өчен Шерлок Холмс турындагы хикәяләр буенча «Яшерен бүлмә» квест-уены үткәрделәр.

2020 елның март аенда Татарстан Республикасы Милли китапханәсенең патентлар бүлегендә (Казан, К.Маркс ур., 36 йорт) «Экология һәм тормыш: җәмгыять нишли ала?» дигән күргәзмә эшли.

Татарстан Республикасы Милли китапханәсенең сәнгать бүлеге (Казан, Театр ур., 5 йорт) «Сәнгати хыяллар дөньясы» дип аталган күргәзмәләр циклын дәвам итә һәм укучылар игътибарына кул эшләренә багышланган «Үзең тудырган матурлык» дигән китап күргәзмәсе тәкъдим итә.

Татарстан Республикасы Милли китапханәсе Швециядә яшәүче милләттәшебез Төркәр ага Соукканнан янә кыйммәтле басмалар кабул итте. Ул 2019 елда 12 данә уникаль китап бүләк иткән иде инде.

Татарстан Республикасы Милли китапханәсенең вакытлы матбугат бүлеге кул эшләренә караган материаллар бастыручы «Burda», «Verena», «Sandra», «Тылсымлы куллар», «Мастерилка», «Анна», «Модное рукоделие» һәм башка журналлар яздырып ала. Әлеге журналлар битләрендәге файдалы идеяләр тегүчеләр өчен генә түгел, ә яңа эш башлаучыларга да кызыклы. Аларга карап кабатланмас дизайнга нигезләнгән матур әйберләр тегәргә өйрәнергә, көнкүреш нигезендә ятучы төрле күнекмәләр алырга мөмкин.

 2020 елның 1 мартыннан 31 мартына кадәр Татарстан Республикасы Милли китапханәсенең икенче бинасындагы уку залында (Казан, К.Маркс ур., 36 йорт) вакытлы матбугат бүлеге хезмәткәрләре әзерләгән, Халыкара хатын-кызлар көненә багышланган «Тормыш яме – Әни, Хатын-кыз» дигән күргәзмә эшли.

28 февраль көнне Казандагы Муса Җәлил музей-фатирында (М.Горький ур., 17 йорт) әлеге музейның үсеш стратегиясе турында фикер алышуга багышланган «түгәрәк өстәл» утырышы булды. Аның эшендә Татарстан Республикасы Милли китапханәсе вәкиле дә катнашты.

Милли китапханәнең кулъязмалар һәм сирәк китаплар бүлеге мөдире Айрат Заһидуллин һәм бүлекнең фәнни хезмәткәре Ильяс Мөстәкыймов Татарстан Республикасының Архив эше буенча дәүләт комитетына Япониянең Кобе шәһәрендәге татар җәмгыяте тарихына караган документларны тапшыру мәрасимендә катнаштылар. Ул Татарстан Республикасы Фәннәр академиясенең Ш. Мәрҗани исемендәге Тарих институтында узды.

Татарстан Республикасы Милли китапханәсенең күргәзмәләр һәм мәдәни программалар бүлеге (Казан, Кремль ур., 33 йорт) язны «Яраткан артистларыбызның таныш йөзләре» дип аталган күргәзмә белән каршылый. Ул 27 мартта билгеләп үтелүче Халыкара театр көненә багышланган.