ЯҢАЛЫКЛАР

2014 нче елның 1 нче апреленнән башлап Татарстан Республикасы Милли китапханәсенең вакытлы матбугат бүлеге, Мәдәният елы һәм Казан шәһәре төрки дөньяның 2014 елгы мәдәни башкаласы дип игълан ителү уңаеннан, шәһәребезнең студентлары һәм мәктәп балалары белән очрашулар оештыра.

Татарстан Республикасы Милли китапханәсенең кулъязмалар һәм сирәк китаплар бүлеге тарафыннан «Рус теле – шигърият теле» дигән темага күргәзмә оештырылды.

2014 нче елның 2 нче апреле көнне Татарстан Республикасы Милли китапханәсенең вакытлы матбугат бүлеге хезмәткәрләре Казан шәһәренең 10 нчы гимназиясендә укучылар өчен газета-журналларга күзәтү үткәрделәр.

21 нче март көнне Буа шәһәре һәм районы Үзәк китапханәсендә язучы Нәбирә Гыйматдинова белән очрашу узды. Ул Татарстан Республикасы Милли китапханәсенең фәнни-методик бүлеге тарафыннан оештырылды.

28 нче мартта Татарстан Язучылар берлеге һәм Татарстан Милли китапханәсе язучы-эзтабар, шагыйрь, Татарстанның атказанган мәдәният хезмәткәре Самат Шакирның тууына 90 ел тулуга (1924-1998) багышланган хәтер кичәсе уздырдылар.

Мәдәният хезмәткәрләренең һөнәри бәйрәменә – 25 нче мартка һәм Халыкара театр көненә – 27 нче мартка багышлап Татарстан Республикасы Милли китапханәсенең мәгълүмат-библиография бүлегендә мәгълүмати чыганаклар – энциклопедияләрдән, белешмәлекләрдән, вакытлы басмалардан, сценарийлардан торган күргәзмә оештырылды.

2014 нче елның 25 нче мартында Татарстан Республикасы Милли китапханәсенең чит телләр бүлегендә (Казан шәһ., К.Маркс ур., 36 нчы йорт), француз теле, мәдәнияте белән кызыксынучыларны берләштерү максатыннан, бөтен дөньяда уздырылучы Франкофония көннәренә багышланган чираттагы очрашу булды.

25нче мартта Мәдәният хезмәткәрләре көнендә Татарстан Республикасы Милли китапханәсендә мәдәният хезмәткәрләре өчен ачык ишекләр көне уздырылды. Ачык ишекләр көнендә мәдәният һәм сәнгатькә караган мәгълүмати-белешмә чыганаклар күргәзмәсен карап чыгу оештырылды, Россиянең Һәйкәлләр җыелмасына кергән архитектура һәйкәле – Татарстан Республикасы Милли китапханәсе бинасы буенча экскурсия үткәрелде.

Кырымның Исмәгыйль Гаспралы исемен йөртүче Республика кырымтатар китапханәсе үткәргән «Исмәгыйль Гаспралы галәме» исемле әдәби укулар эшендә, скайп-элемтә ярдәмендә, Татарстан Республикасы Милли китапханәсе хезмәткәрләре һәм республикабыз галимнәре дә катнашты.

2014 нче елның 21 мартында Татарстан Язучылар берлеге бинасында урнашкан Тукай клубында Г.Тукай исемендәге Дәүләт премиясе лауреаты, Татарстанның халык язучысы Гәрәй Рәхимнең биш томлы сайланма әсәрләрен тәкъдим итү кичәсе узды.